شعر

شبيه إنسان

كلمات /غاده عبد الرؤوف

شبيه أنسان
———————-
ما كنتش يوم سند ليكى
ولا حتى الأمان ف الدار
ف عز البرد يحميكى وعز الصيف
حضوري كان بيشبه طيف
وجودي كان بيشبه ضيف
بتحملي همه لو يدخل
ولو يخرج بعلو الصوت
كأنى زفير خانق صدرك
كأنى الهم على قلبك
جبل ونزاح
ولما ابعد تلاقي براح
وانا برتاح ف قربك ليه
واحبك موت
ومن غيرك بلاقى الموت
فكل صباح
وقلبك منى كله مرار
بيمسح اسمى من نبضه
بيكره سيرتى لو جاتله
بينزف نااار
أنا العاجز وسيبك إنتي للتيار
وضد الريح
وكل مافيا شايفه جريح
ماكنتش حضن يئويكي
ماكنتش حب يرضيكي
ولا ف الحزن كنت الفرح
وامسح دمعه ف عنيكي
بدون تصريح
واتوه جواها تلاقيني
قليل الحيله والقوه
صحيح برايا غير جوه
واحس الدمعه ف جفونك
ما انا السجان
سجينه الفرحه ف عيونك
فكل مكان
غريبه معايا بتحسي
كأن مكاني مش جنبك
وترسمي ضحكه علي وشي
ضرير سامع انين قلبك
هيجي الوقت تبتسمي
وتنزل دمعه على خدك
واحبك بس ف غيابي
بروح ف الصوره ع الجدران
ساعتها بس تفتكري
حياه عشناها بين البين
يا أجمل حد حبيتها
وخبيتها ف نن العين
ياريت أنك تسامحيني
علي قيدك سنين وسنين
أناني بيمتلك ذاتك
شبيه أنسان
فأخر وقتنا الضايع
يا روح نازفه من الحرمان
وكل ما فيكي بيفرفر
ورا القضبان
بيحلم أنه يتحرر
كما العصافير
كلمات الشاعره / غاده عبد الرؤوف

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق